എന്റെ കര്‍ത്താവേ... ഒരു തരത്തിലും ജീവിക്കാന്‍ സമ്മതിക്കത്തില്ല അല്ലിയോ...?... ഇതിപ്പോ എത്ര ദിവസ്സമായി ഇങ്ങനെ...?... കയ്യും കാലും വിറച്ചിട്ട്‌ വയ്യല്ലോ.. പണ്ട് കള്ളുകുടി നിര്‍ത്തിയപ്പോള്‍പോലും ഇങ്ങനെ കൈ വിറച്ചിരുന്നില്ല.. കൊച്ചാപ്പിക്കു ഇരുന്നിട്ട് ഒരു സ്വസ്ഥതയും കിട്ടുന്നില്ല. എത്ര ദിവസ്സമായി നാല് മെയില്‍ ഫോര്‍വേഡ് ചെയ്തിട്ടു.... ഇന്റര്‍നെറ്റും മെയില്‍ ഫോര്‍വേഡ് ചെയ്യുന്നതും ഒരു തരം അഡിക്ഷന്‍ പോലെ ആയിത്തീരുമെന്നു കൊച്ചാപ്പി സ്വപ്നത്തില്‍പോലും വിചാരിച്ചിരുന്നില്ല. ദിവസവും പത്തു മെയില്‍ ഫോര്‍വേഡ് ചെയ്തില്ലെങ്കില്‍ കയ്യും കാലും വിറക്കുന്നത്‌ എന്തെങ്കിലും അസുഖമാണോ ഡോക്ടര്‍?...... കൊച്ചാപ്പി തന്റെ മെയില്‍ ബോക്സ്‌ നിരാശയോടെ വീണ്ടും ക്ലോസ് ചെയ്തു. കേരളയ്റ്റ്സ് മെയില്‍ ഫോര്‍വെര്‍ഡിംഗ് ഗ്രൂപ്പില്‍ നിന്നും വേള്‍ഡ് മെയില്‍ ഫോര്‍വെര്‍ഡിംഗ് ക്ലബ്ബില്‍ നിന്നും ദിവസവും എത്ര മെയിലുകള്‍ വന്നുകൊണ്ടിരുന്നതാ... രാത്രി മുഴുവന്‍ ഉറക്കമിളച്ചു മെയിലുകള്‍ അപ്പ്രൂവ് ചെയ്തിരുന്ന ഗ്രൂപ്പ് മോഡരറ്റര്മാര്‍ ഇപ്പോള്‍ ഉറക്കം വരാന്‍ വേണ്ടി ഉറക്കഗുളികകള്‍ കഴിക്കാന്‍ തുടങ്ങി. ആ മെയിലുകള്‍ എല്ലാം ഫോര്‍വേഡ് ചെയ്തു നിര്‍വൃതി അടഞ്ഞിരുന്ന നല്ല നാളുകളെ കൊച്ചാപ്പി നെടുവീര്‍പ്പോടെ ഓര്‍ത്തു. ഇപ്പോള്‍ ദൈവങ്ങളുടെ പേരിലുള്ള ചെയിന്‍ മെയിലുകള്‍ പോലും വരുന്നില്ല. സൈബര്‍ സെല്ലും രാഷ്ട്രീയ നേതാക്കളുമൊക്കെ ഇങ്ങനെ തുടങ്ങിയാല്‍ പാവപ്പെട്ട കൊച്ചാപ്പിമാര്‍ എന്തു ചെയ്യും..
ഹേ പോലീസുകാരെ, നിങ്ങള്‍ ഒരു കാര്യം മനസ്സിലാക്കണം. ഞങ്ങളുടെ ജീവാത്മാവും പരമാത്മാവുമാണ് ഫോര്‍വേഡെഡ് മെയിലുകള്‍. മുന്‍പൊക്കെ ഞങ്ങള്‍ക്ക് രാവിലെ ഓഫീസിലെത്തിയാല്‍ ജോലി തുടങ്ങുന്നതിനു മുന്‍പ് ഒരു ചായയോ കാപ്പിയോ ആയിരുന്നു വേണ്ടത്. എന്നാല്‍ ഇന്ന്, രാവിലെ തന്നെ നാല് മെയില്‍ ഫോര്‍വേഡ് ചെയ്താലേ അന്നത്തെ ദിവസം ചൊവ്വാകൂ... അതാണ്‌ നിങ്ങള്‍ ഇല്ലതാക്കിയിരിക്കുന്നത്. പകല്‍ മുഴുവന്‍ മെയിലുകള്‍ നോക്കിയിരുന്നാലെ വൈകിട്ട് ഞങ്ങള്‍ക്ക് രണ്ടോ മൂന്നോ മണിക്കൂര്‍ ഓവര്‍ടൈം ചെയ്യാന്‍ പറ്റുകയുള്ളൂ. അങ്ങനെയല്ലേ ഞങ്ങള്‍ ഓഫീസ് ജോലികള്‍ ചെയ്തു തീര്‍ത്തിരുന്നത്‌. അതുകൊണ്ടു ഞങ്ങള്‍ക്ക് കിട്ടിയിരുന്നത് മൂന്നു മണിക്കൂറിനുള്ള ഇരട്ടിവേതനം മാത്രമല്ല. ഡിന്നറും രാത്രി വണ്ടിക്കൂലിയുമായിരുന്നു. എല്ലാം നശിപ്പിച്ചില്ലേ..? തന്നെയുമല്ല
മെയില്‍ ഫോര്‍വേഡ് ചെയ്യുന്നവരെ അറസ്റ്റു ചെയ്യുമെന്ന നിങ്ങളുടെ പ്രസ്താവന മൂലം ഗള്‍ഫില്‍ നിന്നും റംസാന്‍, ക്രിസ്മസ്, ന്യൂ ഇയര്‍ അവധിക്കു വരാനിരുന്ന എത്രയോ പേര്‍ തങ്ങളുടെ അവധി ക്യാന്‍സല്‍ ചെയ്തു എന്നു നിങ്ങള്‍ക്കറിയാമോ..? ഇതുമൂലം എയര്‍ ഇന്ത്യക്ക് എത്ര കോടിയുടെ നഷ്ടമാണ് ഉണ്ടായിരിക്കുന്നത്.
ഞങ്ങള്‍ക്ക് ഒരു യുണിയന്‍ ഇല്ലാത്തതു കൊണ്ട് ഇതിനെതിരെ ആരും ശബ്ദിക്കില്ല എന്നല്ലേ നിങ്ങള്‍ കരുതിയത്‌. എന്നാല്‍ ഞങ്ങള്‍ ഇന്റര്‍നാഷണല്‍ മെയില്‍ ഫോര്‍വേ‍ഡര്‍സ് അസോസിയേഷന്‍ (IMFA) എന്ന പേരില്‍ ഒരു സംഘടന രൂപീകരിച്ചു കഴിഞ്ഞു. ഞങ്ങളുടെ രണ്ടു സജീവ പ്രവര്‍ത്തകരെ അറസ്റ്റു ചെയ്തതില്‍ പ്രതിഷേധിച്ചു സമര പരിപാടികള്‍ ആസൂത്രണം ചെയ്യുകയാണ്. കൂടാതെ ഒരുലക്ഷത്തിഒന്ന് പേരുടെ ഒപ്പ് ശേഖരിച്ചു മൈക്രോസോഫ്ട്‌ ചെയര്‍മാന്‍ ബില്‍ ഗേറ്റ്സിനും ഗൂഗിള്‍ ചെയര്‍മാന്‍ എറിക് ഇ. ഷ്മിറ്റിനും നിവേദനങ്ങള്‍ നല്‍കാനും പദ്ധതിയുണ്ട്. അതുകൊണ്ടു ഫോര്‍വേഡ് മെയിലുകള്‍ പോസ്റ്റാനുള്ള ഞങ്ങളുടെ സ്വാതന്ത്ര്യത്തില്‍ വെറുതെ പാസ്സ്‌വേര്‍ഡ്‌ ഇടാന്‍ നോക്കല്ലേ...
ഈ കോലാഹലമെല്ലാം പത്തു ദിവസ്സത്തെക്കെ ഉണ്ടാവുകയുള്ളൂ എന്നു ഞങ്ങള്‍ക്കറിയാം. ഇതിനു മുമ്പും എത്ര ഭൂകമ്പങ്ങള്‍ ഉണ്ടായിട്ടുണ്ട്..? തന്ത്രി, മന്ത്രി, സ്വാമികള്‍, ടോട്ടല്‍, പോള്‍, തേക്കടി ഇതൊക്കെ ഇന്ന് ആരെങ്കിലും ഓര്‍ക്കുന്നുണ്ടോ.. മറവിയുടെ കാര്യത്തില്‍ മലയാളികള്‍ മുന്പന്തിയിലാണല്ലോ.. അതുകൊണ്ടു ഇതും മാഞ്ഞുപോകും... എന്നിട്ടുവേണം ഈ കൊച്ചാപ്പിക്കും അവധിക്കു നാട്ടിലേക്കു വരാന്‍.
മുന്‍‌കൂര്‍ജാമ്യം (disclaimer) : ഈ മെയില്‍ എന്റെ അറിവോ സമ്മതമോ ഇല്ലാതെ എഴുതിപ്പോയതാണ്. ഇതുകൊണ്ടുണ്ടാകുന്ന ആരോഗ്യപ്രശ്നങ്ങള്‍ക്ക് ഞാന്‍ ഉത്തരവാദിയല്ല... എന്നു പേടിപൂര്‍വ്വം കൊച്ചാപ്പി. (വെറുതെ ഒരു ആന്റി വൈറസ്‌ കിടക്കട്ടെ.)
നമസ്കാരം,
ReplyDeleteബ്ലോഗെല്ലാം കലക്കുന്നുണ്ട്...
ഒരു കൈ സഹായം... ഈ വെണ്ണിയോട് വെള്ളപ്പൊക്കത്തില്‍ എന്ന പടം സ്വന്തമാണെങ്കില്‍, മലയാളം വിക്കിപ്പീഡിയയില്‍ വെണ്ണിയോട് എന്ന ലേഖനത്തില്‍ അപ്ലോഡ് ചെയ്താല്‍ ഉപകാരമായിരിക്കും....
സ്നേഹപൂര്‍വ്വം അനീഷ്
http://ml.wikipedia.org/wiki/%E0%B4%B5%E0%B5%86%E0%B4%A3%E0%B5%8D%E0%B4%A3%E0%B4%BF%E0%B4%AF%E0%B5%8B%E0%B4%9F%E0%B5%8D